UM VERKEFNIÐ
Markmiðið er að styrkja ímynd íslenska hestsins með markaðsetningu og samþættu kynningarstarfi. Áherslan verður á verðmætasköpun og auknar gjaldeyristekjur af greininni.
Um er að ræða markaðssamstarf sem nýtist heildarhagsmunum í að byggja upp orðspor íslenska hestsins til að leggja grunn að auknum gjaldeyristekjum af sölu á hestinum, vörum og þjónustu. Fylgt verður þeirri meginstefnu sem mótuð hefur verið og allir geta kynnt sér. Samstarfið mun tryggja samræmd skilaboð, meiri slagkraft og fókus í kynningunni með langtímasjónarmið að leiðarljósi. Lögð verður áhersla á notkun stafrænnar miðlunar á vef og samfélagsmiðum, almannatengsl og útgáfu kynningarefnis sem byggir á grunnstoðum verkefnisins.
Að verkefninu standa atvinnuvega- og nýsköpunarráðuneytið, mennta- og menningarmálaráðuneytið, Íslandsstofa, Félag hrossabænda, Landssamband hestamannafélaga, Samtök ferðaþjónustunnar, Félag tamningamanna og útflytjendur íslenska hestsins.
Þátttakendur og ávinningur af þátttöku í verkefninu
Aðilum sem rækta íslenska hestinn, framleiða hestavörur eða selja þjónustu tengda hestinum býðst að taka þátt í verkefninu sem og samtök þessara aðila. Einnig geta aðrir sem eru tilbúnir að taka þátt í verkefninu fjárhagslega, s.s. þjónustuaðilar, birgjar og stofnanir eða félög, gerst aðilar að verkefninu.
Ávinningur þátttakenda felst í eftirfarandi:
- Þátttaka í ráðgjafaráði sem fundar tvisvar á ári til rýna stefnu og móta áherslur í markaðsaðgerðum
- Upplýsingar um allar markaðsaðgerðir, niðurstöður rannsókna og ýmis fræðsla
- Tengslamyndun við þátttakendur
- Sýnileiki og upplýsingar um þátttakanda, m.a. með lógó viðkomandi á vefsíðu verkefnisins og tengill á vefsíðu þátttakanda, sýnileiki á viðburðum, upplýsingaefni í fjölmiðlapakka sem dreift er til blaðamanna sem koma til landsins í tengslum við verkefnið og kynning með beinum markpósti
- Möguleiki að tengjast markaðsaðgerðum og viðburðum s.s. í tengslum við Landsmót og Heimsmeistaramót þar sem verkefnið verður kynnt
- Leyfi til að nýta einkenni verkefnisins (Horses of Iceland – færir þig nær náttúrunni) á vefsíðu þátttakanda með tengingu inn á vefsíðu verkefnisins
- Önnur tækifæri verða þróuð í samráði við þátttakendur
Þátttakendur staðfesta þátttöku til 18 mánaða (júní 2021) og samþykkja skilmála verkefnisins með undirskrift sinni. Greiðslur fara fram árlega í tvennu lagi, helmingurinn í upphafi árs og helmingurinn í lok árs.